ମଙ୍ଗଳବାର ସକାଳେ ଦିଲ୍ଲୀ ବିଧାନସଭାକୁ ଉଡ଼ାଇ ଦେବା ପାଇଁ ଧମକ ଖବର ମିଳିବା ପରେ ରାଜଧାନୀରେ ଆତଙ୍କ ଖେଳିଯାଇଥିଲା। ମୁଖ୍ୟମନ୍ତ୍ରୀ ରେଖା ଗୁପ୍ତା ବଜେଟ୍ ଉପସ୍ଥାପନ କରିବାର କିଛି ଘଣ୍ଟା ପୂର୍ବରୁ ଏହି ଧମକ ଦିଆଯାଇଥିଲା।
ସରକାରୀ ସୂତ୍ର ଅନୁଯାୟୀ, ପ୍ରଥମ ଧମକପୂର୍ଣ୍ଣ ଇମେଲ୍ ସକାଳ ୭:୨୮ ରେ ବିଧାନସଭାକୁ ପଠାଯାଇଥିଲା,ଏବଂ ଦ୍ୱିତୀୟ ଇମେଲ୍ ବିଧାନସଭା ବାଚସ୍ପତି ବିଜେନ୍ଦର ଗୁପ୍ତା ସକାଳ ୭:୪୯ ରେ ପାଇଥିଲେ। ଏହା ଦ୍ୱିତୀୟ ଘଟଣା ଯେଉଁଥିରେ ତାଙ୍କୁ ଏପରି ଧମକ ମିଳିଛି। ଗୁପ୍ତାଙ୍କୁ ଏହି ଧମକ ତାଙ୍କ ବ୍ୟକ୍ତିଗତ ଇମେଲ୍ କୁ ପଠାଯାଇଥିଲା । ଏହି ଧମକପୂର୍ଣ୍ଣ ଇମେଲ୍ ଜଣେ ଖଲିସ୍ତାନୀ ସମର୍ଥକଙ୍କଠାରୁ ଆସିଥିଲା।
ଧମକ ପାଇବା ପରେ ତୁରନ୍ତ ପୋଲିସ ଏବଂ ସୁରକ୍ଷା କର୍ମୀମାନେ ଘଟଣାସ୍ଥଳରେ ପହଞ୍ଚି ସମଗ୍ର ପରିସରରେ ପୁଙ୍ଖାନୁପୁଙ୍ଖ ତଦନ୍ତ ଆରମ୍ଭ କରିଛନ୍ତି। ସୁରକ୍ଷା କର୍ମୀମାନେ ବିଧାନସଭା ପରିସର ଏବଂ ଆଖପାଖ ଅଞ୍ଚଳ ମଧ୍ୟରେ ସୁରକ୍ଷା ବ୍ୟବସ୍ଥାକୁ ଆହୁରି କଡ଼ାକଡ଼ି କରିଛନ୍ତି। ବର୍ତ୍ତମାନ ଗୁପ୍ତାଙ୍କୁ ‘Y’ ବର୍ଗର ସୁରକ୍ଷା କବଚ ଦିଆଯାଇଛି ।
ସୂତ୍ର ଅନୁସାରେ, ଧମକପୂର୍ଣ୍ଣ ଇମେଲରେ ଲେଫ୍ଟନାଣ୍ଟ ଗଭର୍ଣ୍ଣର ତରନଜିତ ସିଂହ ସାନ୍ଧୁ, ମୁଖ୍ୟମନ୍ତ୍ରୀ ରେଖା ଗୁପ୍ତା ଏବଂ କ୍ୟାବିନେଟ ମନ୍ତ୍ରୀ ମଞ୍ଜିନ୍ଦର ସିଂହ ସିରସାଙ୍କ ସମେତ ଅନେକ ଉଚ୍ଚ-ପ୍ରୋଫାଇଲ୍ ନେତାଙ୍କ ନାମ ଉଲ୍ଲେଖ କରାଯାଇଛି।
ବର୍ତ୍ତମାନ, ପୋଲିସ ଏବଂ ଅନ୍ୟାନ୍ୟ ଏଜେନ୍ସିଗୁଡ଼ିକ ଇମେଲର ଉତ୍ସକୁ ଖୋଜିବାରେ ନିୟୋଜିତ ଅଛନ୍ତି। ଏହା ସହିତ, କୌଣସି ସମ୍ଭାବ୍ୟ ବିପଦକୁ ଦୃଷ୍ଟିରେ ରଖି ଅନ୍ତର୍ଘାତ-ବିରୋଧୀ ତଦନ୍ତ ଚାଲିଛି।
ଅଧିକାରୀମାନେ କହିଛନ୍ତି ଯେ ପରିସ୍ଥିତି ଉପରେ ନଜର ରଖାଯାଇଛି, ଏବଂ ବର୍ତ୍ତମାନ ଭୟଭୀତ ହେବାର କୌଣସି ଆବଶ୍ୟକତା ନାହିଁ।
