ସ୍ୱାମୀଙ୍କ ପରକିୟା ପ୍ରୀତିରେ ଅତିଷ୍ଠ ହୋଇ ନ୍ୟାୟ ପାଇଁ ଥାନାର ଦ୍ବାରସ୍ଥ ହୋଇଛନ୍ତି ଜଣେ ୨୭ ବର୍ଷୀୟ ବିବାହିତା ମହିଳା । ବାଲେଶ୍ୱର ଜିଲ୍ଲା ଭୋଗରାଇ ଥାନା ଅନ୍ତର୍ଗତ ଅଡଙ୍ଗ ପନ୍ତେଇ ଗାଁର ମମତା ରାଣୀ ମାଝି ଶ୍ବଶୁର ଘର ଲୋକଙ୍କ ନିର୍ଯାତନାର ଶିକାର ହୋଇ ଭୋଗରାଇ ଥାନାର ଦ୍ବାରସ୍ଥ ହୋଇ ନ୍ୟାୟ ପାଇଁ ବାରମ୍ବାର ଥାନାକୁ ଦୌଡୁଥିବା କହିଛନ୍ତି ।
ସୂଚନା ଅନୁଯାୟୀ ବାଲେଶ୍ବର ଜିଲ୍ଲା ଜଳେଶ୍ବର ଥାନା ଅନ୍ତର୍ଗତ ଗଡସାହି ବାଲିଆପାଳ ଗାଁର ବରେନ୍ଦ୍ର କୁମାର ମାଝୀଙ୍କ ଝିଅ ମମତା ରାଣୀ ମାଝୀ ଗତ ୨୦୨୪ ମସିହା ଜୁନ୍ ୭ ତାରିଖରେ ଅଡଙ୍ଗ ପନ୍ତେଇ ଗାଁର ବିମଳ ବେଜଙ୍କ ପୁତ୍ର ସଞ୍ଜୟ କୁମାର ବେଜଙ୍କୁ ବିବାହ କରିଥିଲେ । ମାତ୍ର ମମତାଙ୍କ ଅଭିଯୋଗ ଅନୁଯାୟୀ ବିବାହର ମାତ୍ର ୮ ଦିନ ପରେ ଶାଶୁଘର ଲୋକେ ଅଧିକ ଯୌତୁକ ଦାବି କରି ଛୋଟ ଛୋଟ କଥାରେ ମାରପିଟ କରିବା ସହ ବାପଘରୁ ଯୌତୁକ ନ ଆଣିଲେ ଜୀବନରୁ ମାରି ଦେବାର ଧମକ ବି ଦେଉଥିଲେ । ଏପରିକି ସ୍ବାମୀଙ୍କ ଦ୍ଵିତୀୟ ବିବାହର ଧମକ ସହ ଅନେକ ସମୟରେ ପରିବାର ଲୋକେ ମମତାଙ୍କୁ ଖାଇବାକୁ ନଦେଇ ଉପାସରେ ରଖୁଥିଲେ । ଏଥିପାଇଁ ବାରମ୍ବାର ବୈଠକରେ ସମାଧାନ ହୋଇଥିଲେ ମଧ୍ୟ ଅତ୍ୟାଚାରର ଶିକାର ହୋଇଥିଲେ ମମତା । ଏନେଇ ମମତା ମାଡ଼ ଭୟରେ ବାପ ଘରକୁ ପଳାଇ ଆସିଥିଲେ । ସେହି ଦିନରୁ ସମସ୍ତ ଯୋଗାଯୋଗ ବିଚ୍ଛିନ୍ନ କରିବା ସହ ମମତାଙ୍କୁ ବୋହୁର ଅଧିକାର ଦେଉ ନଥିଲେ ମମତାଙ୍କ ଶାଶୁଘର ଲୋକେ ।
ତେବେ ସ୍ୱାମୀ ସଞ୍ଜୟ ବାହାର ରାଜ୍ୟରେ ଦାଦନ ଶ୍ରମିକ ଭାବେ କାମ କରୁଥିବା ବେଳେ ଅନ୍ୟ ମହିଳାଙ୍କ ସହ ପରକିୟା ପ୍ରିତୀରେ ଲିପ୍ତଥିବା ଅଭିଯୋଗ ହୋଇଛି । ତେବେ ଗତ ନଭେମ୍ବର ୨ ତାରିଖରେ ସଞ୍ଜୟ ଗାଁକୁ ଫେରିଥିବା ନେଇ ମମତା ଜାଣିବା ପରେ ଶ୍ବଶୁର ଘରକୁ ଆସିଥିଲେ । କିନ୍ତୁ ଶାଶୁ ଶ୍ବଶୁର ମମତାଙ୍କୁ ଦେଖି ଗାଳି ଗୁଲଜ କରିବା ସହ ମାରିବାକୁ ଚେଷ୍ଟା କରିଥିଲେ ବୋଲି ଅଭିଯୋଗ କରିଛନ୍ତି ମମତା । ଜୀବନ ବିକଳରେ ମମତା ପୁଣି ନିଜ ବାପାଘରକୁ ପଳାଇ ଆସିଥିଲେ । ନ୍ୟାୟ ପାଇଁ ମମତା ଭୋଗରାଇ ଥାନାର ଦ୍ବାରସ୍ଥ ହୋଇଥିବା ବେଳେ ଅଭିଯୋଗକୁ ଭିତ୍ତି କରି ମାମଲା ରୁଜୁ କରି ତଦନ୍ତ ଚଳାଇଛି ପୋଲିସ । ଏନେଇ ପୋଲିସର ପ୍ରତିକ୍ରିୟା ମିଳି ପାରିନି । ସେପଟେ ଶାଶୁଘର ଲୋକଙ୍କର ବି ପ୍ରତିକ୍ରିୟା ମିଳିପାରିନି ।
