ଆଜି ରାଖି ପୂର୍ଣ୍ଣିମା। ଚାରିଆଡ଼େ ଭାଇ-ଭଉଣୀଙ୍କ ସ୍ନେହ, ଭଲପାଇବା ଓ ଖୁସିର ମାହୋଲ। କେଉଁଠି ଭଉଣୀ ଭାଇର ହାତରେ ରାଖି ବାନ୍ଧୁଛି, ତ ଆଉ କେଉଁଠି ଭାଇ ଭଉଣୀକୁ ଉପହାର ଦେଇ ତା’ର ମୁହଁରେ ହସ ଫୁଟାଉଛି। ହେଲେ ବାଲେଶ୍ୱର ଜିଲ୍ଲା ବାଲିଆପାଳ ବ୍ଲକ ବିଷ୍ଣୁପୁର ଗାଁର ଏକ ପରିବାର ପାଇଁ ଚଳିତବର୍ଷର ରାଖି ପୂର୍ଣ୍ଣିମା ପାଲଟିଯାଇଛି ଅସହ୍ୟ ଦୁଃଖର ଦିନ।
ଅନେକ ଦିନ ଧରି ଭାଇ ଅପେକ୍ଷା କରିଥିଲା ରାଖି ପୂର୍ଣ୍ଣିମାକୁ। ଭଉଣୀ ଆସିବ, ହାତରେ ରାଖି ବାନ୍ଧିବ, କପାଳରେ ଟିକା ଲଗାଇବ ଏବଂ ଭାଇ ତାକୁ ଉପହାର ଦେବ—ଏଭଳି ଅନେକ ସ୍ୱପ୍ନ ଥିଲା। କିନ୍ତୁ ରାଖି ପୂର୍ଣ୍ଣିମା ଆସିବା ପୂର୍ବରୁ ହିଁ ଭାଇଠାରୁ ଚିରଦିନ ପାଇଁ ଦୂରେଇଗଲା ତା’ର ପ୍ରିୟ ଭଉଣୀ।
ସାପ କାମୁଡ଼ାରେ ଅକାଳରେ ଜୀବନ ହାରିଛନ୍ତି ନାବାଳିକା ନନ୍ଦିତା ପ୍ରମାଣିକ। ତାଙ୍କ ଅକାଳ ବିୟୋଗ ପରେ ପରିବାର ଉପରେ ଭାଙ୍ଗିପଡ଼ିଛି ଦୁଃଖର ପାହାଡ଼। ବିଶେଷକରି ଭାଇ ପାଇଁ ଏହି ରାଖି ପୂର୍ଣ୍ଣିମା ଅତ୍ୟନ୍ତ ଯନ୍ତ୍ରଣାଦାୟକ ହୋଇଛି।
ଯେଉଁ ହାତରେ ଭଉଣୀ ରାଖି ବାନ୍ଧିବା କଥା, ସେହି ହାତ ଆଜି ନାହିଁ। ଯେଉଁ ସ୍ୱରରେ ଭାଇ ବୋଲି ଡାକ ଶୁଣିବାର ଥିଲା, ସେହି ସ୍ୱର ଚିରଦିନ ପାଇଁ ନିରବ। ଆଜି ଭାଇ ହାତରେ ରାଖି ଧରି ଅପେକ୍ଷା କରୁଛି, କିନ୍ତୁ ରାଖି ବାନ୍ଧିବା ପାଇଁ ଭଉଣୀ ନାହିଁ।
ଘରେ ଅନ୍ୟମାନଙ୍କ ପାଇଁ ରାଖିର ଖୁସି ଥିବାବେଳେ, ଏହି ପରିବାର ପାଇଁ ଆଜି କେବଳ ସ୍ମୃତି, ନିରବତା ଓ ଲୁହ। ଭଉଣୀର ହାତରୁ ରାଖି ନେବା ବଦଳରେ ଭାଇକୁ ଆଜି ତା’ର ଫଟୋକୁ ଚାହିଁ ରହିବାକୁ ପଡ଼ୁଛି।
ସମୟ ବିତିଯିବ। ପ୍ରତିବର୍ଷ ରାଖି ପୂର୍ଣ୍ଣିମା ଆସିବ। ଘରେ ଘରେ ଭଉଣୀମାନେ ଭାଇଙ୍କ ହାତରେ ରାଖି ବାନ୍ଧିବେ। କିନ୍ତୁ ବିଷ୍ଣୁପୁରର ଏହି ଭାଇ ପାଇଁ ପ୍ରତିଟି ରାଖି ପୂର୍ଣ୍ଣିମା ନନ୍ଦିତାଙ୍କ ସ୍ମୃତିକୁ ଆହୁରି ତାଜା କରିଦେବ। ରାଖି ରହିବ, ଭାଇ ରହିବ—ହେଲେ ସେହି ରାଖି ବାନ୍ଧିବାକୁ ଆଉ ଭଉଣୀ ନଥିବ।
