ଅଭିନେତା ଗୋବିନ୍ଦାଙ୍କ ସ୍ୱାସ୍ଥ୍ୟାବସ୍ଥା ହଠାତ୍ ଖରାପ ହୋଇଯାଇଛି। ତାଙ୍କୁ ତୁରନ୍ତ ହସ୍ପିଟାଲକୁ ନିଆଯାଇଥିଲା, ଯେଉଁଠାରେ ତାଙ୍କର ଚିକିତ୍ସା ଚାଲିଛି। ମଙ୍ଗଳବାର ରାତିରେ ଗୋବିନ୍ଦା ତାଙ୍କ ଘରେ ଚେତାଶୂନ୍ୟ ହୋଇଯାଇଥିଲେ, ଯାହା ପରେ ଜଣେ ଡାକ୍ତରଙ୍କ ସହ ଯୋଗାଯୋଗ କରାଯାଇଥିଲା ଏବଂ ଡାକ୍ତରଙ୍କ ପରାମର୍ଶ କ୍ରମେ ଗୋବିନ୍ଦାଙ୍କୁ କିଛି ଔଷଧ ଦିଆଯାଇଥିଲା। ଏହା ପରେ, ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା।
ଗୋବିନ୍ଦାଙ୍କ ବନ୍ଧୁ ଏବଂ ଆଇନଗତ ପରାମର୍ଶଦାତା ଲଳିତ ବିନ୍ଦଲ ଗଣମାଧ୍ୟମକୁ କହିଛନ୍ତି, “ଡାକ୍ତରଙ୍କ ସହ କଥା ହେବା ପରେ, ତାଙ୍କୁ ଔଷଧ ଦିଆଯାଇଥିଲା ଏବଂ ରାତି ୧ଟାରେ ହସ୍ପିଟାଲର ଜରୁରୀକାଳୀନ ସ୍ଥିତିରେ ଭର୍ତ୍ତି କରାଯାଇଥିଲା।”
ବିନ୍ଦଲ ଆହୁରି କହିଛନ୍ତି, “ଗୋବିନ୍ଦାଙ୍କ ସ୍ୱାସ୍ଥ୍ୟ ପାଇଁ ଅନେକ ଟେଷ୍ଟ କରାଯାଇଛି,ଏବଂ ଏପର୍ଯ୍ୟନ୍ତ କିଛି ରିପୋର୍ଟ ଆସିନାହିଁ । ରିପୋର୍ଟ ଆସିବା ପରେ ହିଁ ଆମେ କିଛି କହିପାରିବୁ।” ଗୋବିନ୍ଦାଙ୍କ ସ୍ୱାସ୍ଥ୍ୟାବସ୍ଥା ବିଷୟରେ ଅଧିକ ବିବରଣୀ ଦେବାକୁ ବିନ୍ଦଲ ମନା କରିଦେଇଛନ୍ତି।
ଆମେ ଏଠି କହି ରଖୁଛୁ ଯେ ଗତ ବର୍ଷ ଅକ୍ଟୋବରରେ ଗୁଳି ବାଜିଥିବାରୁ ଗୋବିନ୍ଦା ଆହତ ହୋଇଯାଇଥିଲେ । ସେ ଭୁଲବଶତଃ ତାଙ୍କ ଲାଇସେନ୍ସପ୍ରାପ୍ତ ପିସ୍ତଲରୁ ନିଜ ଗୋଡରେ ଗୁଳି ଚଳାଇ ଦେଇଥିଲେ। ତାଙ୍କୁ ଜୁହୁ ନିକଟସ୍ଥ ଏକ ହସ୍ପିଟାଲରେ ଭର୍ତ୍ତି କରାଯାଇଥିଲା, ପ୍ରାୟ ଏକ ଘଣ୍ଟା ଅସ୍ତ୍ରୋପଚାର ପରେ ତାଙ୍କ ଗୋଡରୁ ଗୁଳି ବାହାର କରାଯାଇଥିଲା।
ହସ୍ପିଟାଲରୁ ଡିସଚାର୍ଜ ହେବା ପରେ, ଗୋବିନ୍ଦ କହିଥିଲେ, “ମୁଁ କୋଲକାତାରେ ଏକ ଶୋ ପାଇଁ ଯାଉଥିଲି ଏବଂ ସକାଳ ପ୍ରାୟ 5ଟା ବାଜିଥିଲା। ସେହି ବନ୍ଧୁକଟି ପଡ଼ିଗଲା ଏବଂ ଫୁଟିଗଲା। ମୁଁ କିଛି ସମୟ ପାଇଁ ସ୍ତବ୍ଧ ହୋଇଗଲି ଏବଂ ତା’ପରେ ମୁଁ ଦେଖିଲି ଯେ ମୋ ଗୋଡ଼ରୁ ପ୍ରଚୁର ରକ୍ତସ୍ରାବ ହେଉଥିଲା।”
